ڕێوڕەسمی بێڵندانە لە ئاوایی هەڵوێ بەڕێوە چوو

بەپێی هەواڵی هاژە؛ ڕۆژی سێشەممە، ڕێکەوتی ١۶ی ڕێبەندانی ١۴٠٣ی کۆچیی هەتاوی، ڕێوڕەسمی بێڵندانە لە ئاوایی هەڵوێی میراوێ بەڕێوە چوو.

ئەم ڕێوڕەسمە بە بەشداریی نیزیکەی دە هەزار کەس بەڕێوە چوو و تێیدا هونەرمەندان و چالاکانی بواری فەرهەنگی لە شارەکانی دەورپشتی سەردەشت سەردانی هەڵوێیان کرد و بەشداریی ڕێوڕەسمی بێڵندانەی ئەمساڵ بوون.

ڕێوڕەسمەکە بریتی بوو لە چەند بەشی جیاواز وەک شێعرخوێندنەوە، گۆرانی و بەرنامەی تایبەت بە بێڵندانە.

"بێڵندانە" بە واتای ئەوەیە "بێڵ و وەروەرە" دادەنێن و چی دیکە بەفر ناماڵدرێ، یان بە واتایەک مزگێنیی هاتنی بەهار دەدرێت.

ڕێوەڕەسمی "بێڵندانە" مێژووەکەی بۆ چەند هەزار ساڵ لەوە پێش دەگەڕێتەوە و لە کۆتایی چلەی یەکەمی زستانی هەموو ساڵێک لە ناوچە جیاوازەکانی کوردستان بە تایبەت موکریان بەڕێوە دەچێت.