مێژوویەکی بێ قەدر و یادێکی لە بیرکراو

نەمدیتوە و نەمبیستوە لە ساڵانی دواییدا باسی ئەو ڕوداوە گرینگە کرابێ و بەهای تایبەتی خۆی پێدرابێ. تەنانەت ڕەنگە ئەگەر ئاماری بونیادی شەهیدی کۆماری ئیسلامی نەبا کە ناوی بەشێکی بەرچاوی گیانبەختکردوانی تۆمار کردووە، زەحمەت بوو ناو و ڕادەی قوربانیانیش بە دروستی بزانین. دەسکورتی و هەژاری مێژوونووسی یەکێک لەو پەتا گەورانەیە کە قەت بەرۆکی بەرنەداوین. نە 600 کەس ئەوەندە کەمە و نە ساڵی 59ش ئەوەندە دوورە کە ئاوا سووک و هاسان لە بیرمان بچێتەوە.

 فەوریەی 2016ش سەتەمین ساڵیادی کوشتاری بە کۆمەڵی پێنج تا حەوت هەزار نەفەر لە خەڵکی سابڵاغ و گوندەکانی دەور وبەر بوو کە چەن مانگ لەوەی پێش‌ بێ بچووکترین ئاوەڕدانەوە بەڕێمان کرد.

هەریەک لەو ڕوداوانە و دەیان ڕوداوی گەورە و بچووکی دیکە، ئەو دار‌ و پەردوویانەن کە جیهانی ئەمڕۆمانیان دروست کردوە. ئەگەر دەرکێکی دروستمان لە ڕابردوو نەبێ چۆن دەتوانین دەرسی لێوەرگرین و چۆن دەکرێ توانای فام کردنەوەی تێپەڕینی کات وەک وزەیەکی دەرونناسانە لە ناخماندا بپارێزێن. لە ڕۆژاوا و تەنانەت لە ئێرانیش دا دەزگاکانی ڕاگەیاندن و میدیا و ناوەندە فێرکاریەکان شەو و ڕۆژ خەریکی چرپاندنەوەی مێژوو بە گۆی خەڵک دان. چونکا ئەوە بەشێکی گرینگ لە مکانیزمی سیاسەت سازییە. مخابن لێرە وانییە. زەمان ڕانەوەستاوە، بەڵام هەمیشە سەعات بە کاتی ئێستایە. ئێستا پردی نێوان دوینێ و سبەی نییە، بەس بۆ خۆیەتی و تەواو. ڕوداوێکی تیژپەڕ دەبێتە هەوێنی باسێکی گەرم و گوڕی فەیس بووکی و چەن ڕۆژان خەڵک بەخۆیەوە دەخافڵێنێ. پێشینە و پاشەرۆکیشی‌ نادیترێ تا تەواو دەبێ و دەڕوا. ئێرە بە کاتی ئێستایە و ڕوداو قەت نابێتە مێژوو. ئاخۆ کەی " یەرواند ئابڕاهامیان"یکیش لە نێومان هەڵدەکەوێ و چۆن خۆری مێژوونووسی لە وڵاتی ئێمەش هەڵدێ؟!