| تاريخ: ۱۳۹۶ جمعه ۳۱ شهريور ساعت ۱۰:۴۴ | بازدید: 2293 نظرات: 0 کد مطلب: 4576 |
کۆڕی ڕوونوێنی له کۆمەڵه چیرۆکێک له بۆکان بەڕێوە چوو
به پێی هەواڵی هاژه، ڕۆژی پێنج شەممۆ 30 خەرمانانی 96ی هەتاوی کۆڕی پەردەلادان له کتێبی "با زۆر شت له‌گه‌ڵ خوی نابا" به ئامادەبوونی کۆمه‌ڵێکی بەرچاو له شاعیران، نووسەران، ئه‌دیبان و لایه‌نگرانی وێژه و ئه‌دەبی کورد له ساڵۆنی سیمورغی شاری بۆکان و له لایه‌ن ئه‌نجومه‌نی ئه‌دەبی ئه‌و شاره بەڕێوە چوو.
له سەرەتای کۆڕەکەدا هێمن عەبدوڵڵاپوور وەک نووسەری ئه‌م کۆمەڵه چیرۆکه به خێرهاتنی هەموو میوانان و بەشداربووانی کۆڕەکه‌ی کرد و وتی: ئه‌م چیرۆکانه له بارودۆخێکدا نووسراون که کۆمەڵگا دەسته‌ویه‌خه‌ی کۆمەڵێک کارەساتی ناخۆش بووه و ڕاسته‌وخۆ و ناڕاسته‌وخۆ له سەر بیر و زەینی نووسەر و هونه‌رمه‌ند کاریگه‌ریان بووە.
محه‌ممه‌د ڕەمه‌زانی نووسەر و وەرگێڕ وەک یه‌که‌م وتاربێژی ئه‌م کۆڕه له سەر یه‌کێک له چیرۆکەکانی ئه‌م کتێبه به ناوی "پەڵه هەورێک به نێو قەدی زەویدا" دوا و وتی: ته‌کنیک لەو چیرۆکەدا ته‌لفیق و پێکهاته‌یه‌که له چەند بەیتی کوردی وەک سەیدەوان و لەشکری و.. که نووسەر وێڕای کەڵک وەرگرتن له فۆلکلۆر به شێوەیه‌کی حماسی قالبێکی هونه‌ری پێداوە.
ڕەمه‌زانی وتیشی: لەم چیرۆکەدا شایه‌تی بڕیارنامه‌یه‌کی به‌هێزین دژی شەڕ که نووسەر به زمانێکی ساده و ساکار کۆتایی چیرۆک بۆ خوێنه‌ر ئاوەڵه دەهێڵێته‌وە.
سەیدقادر هیدایه‌تی لەم کۆڕەدا وێڕای ئاماژه به‌وە که "هێمن عەبدوڵڵاپوور" چیرۆک نووسێکی ئه‌زموون گەرایه وتی: بەڕێزیان له هەر دوو کتێبی ئیستا و پێشوویدا کەڵکی له شێواز و ستایلێکی تایبه‌تی چیرۆک نووسی وەرگرتووه که ئه‌م حاڵه‌ته له کۆمەڵه چیرۆکی ئێستایدا به‌هێزتر خۆ به دەسته‌وە دەدا.
هیدایه‌تی جەختیشی کردەوە: ئه‌م چیرۆک نووسە دەرکێکی دروستی له بەکارهێنانی ئیجاز و چیرۆک هه‌یه و له بەستێنی زمانیدا گۆڕانی به‌خۆیه‌وە بینیوە.
سێیه‌م وتاربێژی ئه‌م کۆڕه لەسەر پوتانسیه‌ل و تواناییەکانی چیرۆک نووسی له شاری بۆکان دوا و بوونی که‌سانێکی وەک حەسەن قزڵجی، فەتاح ئه‌میری و محه‌ممه‌د ڕەمەزانی وەک سەرمایه‌یه‌کی به‌هێزی چیرۆک نووسی لەم شارە ناو برد و وتی: سەرەڕای هەمووی ئه‌وانه گۆڕەپان و و مەیدان بۆ بانگه‌شەی کار و چالاکی ئه‌دەبی لاوازه و دەرفه‌تێک به نێوی ڕوونوێنی له کتێب دەتوانێ ئه‌و هەلەمان بۆ بقوازێته‌وە تا شایه‌تی تێوەگلانی یه‌ک شار لەگەڵ بەرهه‌مێکی نوێ بین.
ئه‌مجەد غوڵامی هەروەها ڕایگه‌یاند: نووسەری ئه‌م کۆمەڵه چیرۆکه لەگەڵ ئه‌مرێکی واقع و واقعییه‌تێکی دەرەکی بەرەوڕوویه و له چیرۆکەکانیدا ئۆبژه‌یه‌کی سیاسی خۆ به دەسته‌وە دەدا و ئه‌م کۆمه‌ڵه چیرۆکه به نیسبه‌ت بەرهه‌می پێشووی گۆڕانکاری بەرچاوی به خۆیه‌وه بینیوە.
کۆمەڵه چیرۆکی "با زۆر شت له‌گه‌ڵ خوی نابا" به‌رهه‌می هێمن عەبدوڵڵاپوور چیرۆک نووسی بۆکانی، خاوەن 6 چیرۆک و له 86 لاپەڕەدا که له لایه‌ن چاپەمەنی گوتار بڵاو کراوەته‌وە.
|
