۱۴۰۴/۳/۱۸ ۴:۳۰
| تاريخ: ۱۲ مرداد ۱۴۰۳ ساعت ۲۰:۵ | بازدید: 2354 نظرات: 20 کد مطلب: 23433 |
کاک کەماڵ ئاڕبان؛ مرۆڤێکی هەڵکەوتە و تایبەت
نووسینی: زاهیر سەیدی
شەوی شەممە لەسەر یەکشەممە ڕێکەوتی شەشی گەلاوێژی 1403ی هەتاوی هەواڵی کۆچی لەناکاوی کاک کەماڵ ئاڕبان و هاوسەرەکەی خاتوو شادی مەحموودی بە هۆی وەرگەڕانی ماشێن لە نزیک مەراغە بڵاو بۆوە.
گیان لەدەستدانی کاک کەماڵ و هاوژینەکەی لە تەمەنی کەم و بەو شێوە دڵتەزێنە بوو بە هۆی خەم و پەژارەی لە ڕادەبەری خزم و ناسیاو و هاوڕێ و هاوکار و بە گشتی هەموو خەڵکی شارەکەمان.
خودالێخۆشبوو کاک کەماڵ خاوەنی چەندین تایبەتمەندیی بوو کە لێرەدا ئاماژەیان پێدەکەین:
یەکەم؛ لە ڕووی ئەخلاقی مرۆڤێکی لەبەردڵان، مێهرەبان، لێو بە بزە و خوێن شیرین، شایی بە خۆ، جوانچاک، بەڕێز و خاکەڕا و ... بوو و ئەو خەسڵەتانە ئەویان کردبوو بە مرۆڤێکی کۆمەڵایەتی و خۆشەویست.
دووهەم؛ کاک کەماڵ مامۆستای قوتابخانە بوو. ئەو بەڕێزە کە لە کاتی کۆچی دوایی دا تەمەنی لە 45 ساڵ تێپەڕیبوو، پێشینەی خزمەتی لە ئیدارەی پەروەردی مەهاباد 27 ساڵ بوو. لە ماوەی ئەو ساڵانە دا چ وەک مامۆستا و چ وەک جێگر و بەڕێوەبەری قوتابخانە لە ڕیزی باشترین و سەرکەوتووترین هاوکارانی دابوو. کاک کەماڵ لە قوتابخانە و بە تایبەتی وەک بەڕێوەبەری قوتابخانە جیددی، بە نەزم و ڕێکوپێک، دڵسۆز و ماندوویی نەناس حەولی بەڕێوەبردنی قوتابخانەی دەدا و لەو پێناوەدا ئامانجی پێگەیاندنی خوێندکارانی باش و سەرکەوتووی دەدا و لەو ڕێیەوە خزمەتی بە بەشی پەروەردی شارەکەی دەکرد. هەر ئەو دڵسۆزی و جیدییەتە بوو بە هۆی ئەوەی هەم مامۆستاکان و هەم خوێندکار و بنەماڵەکانیان قوتابخانە بە شوێنیکی گونجاو و زۆر باش بزانن. هەروەها لە کاتێک دا کە دۆخی دەزگای پەروەردە لە ئاستێک باش دا نیە و خەسار و کێشەکان یەکجار زۆرن حەولی کاک کەماڵ و هاوکارانی قوتابخانەکەیان وەک یەکێک لە باشترین قوتابخانەکانی شار لێکردبوو. جێگای ئاماژەیە کە کاک کەماڵ گرینگی بە کۆڕ و کۆبوونەوەی نێو هاوکاران دەدا و پرس و کێشەکانی نێو قوتابخانەی بە کوردییەکی زۆر پاراو و بە ئاخافتنێکی زۆر شیاو باس لێدەکرد. جگە لەوەش لە نووسین بە ڕێزمان و ڕێنووسی دروستی کوردی چاوپۆشی نەدەکرد.
سێهەم؛ تایبەتمەندیی دیکەی کاک کەماڵ چالاکی لە بواری یاریی کۆن و کوردەواریی جۆرابێن بوو. کاک کەماڵ ئاڕبان کە لە نێو چالاکانی ئەو بوارە بە "کەماڵی موعەلیم" ناوبانگی هەبوو، ساڵانێکی زۆر هۆگری ئەو یارییە بوو. ئەو بە یەکێک لە ناودارترین یاریزانەکانی ئەو یارییە لە مەهاباد و موکریان دێتە ئەژمار. لە زۆربەی فستیڤاڵ و خولەکانی جۆرابێن بەشداری کردووە و پلەی باڵای تۆمار کردووە. به وتەی شارەزایانی ئەو بوارە کاک کەماڵ یەک لەو کەسانە بووە کە دەوری لە بە دامەزراوەییکردنی ئەو یارییەدا گێڕاوە. حەولەکانی کاک کەماڵ و هاوڕێیانی لەو بەستێنەدا بە گرتنی ساڵۆن و دامەزراندنی کۆمیتە و بەڕێوەبردنی خولی یارییەکان و ... ئەو کایە کۆنەی وەک یاری پێناسە کردووە. ئەو حەولانە لەو ساڵانەی دوایی دا ئەو یارییەی بە جۆرێک لە جۆرەکان بردە ئاستێکی سەرتر و دوبارە لە نێو خەڵک دا بووژاندەوە.
لە کۆتایی پێویستە ئاماژە بکەین کە لەدەستدانی کاک کەماڵ وەک مرۆڤێکی هەڵکەوتە و تایبەت یەکجار جێی داخ و خەسارە. هەر بۆیە پێویستە ئەزموون و حەولەکانی هەم لە بواری پەروەردە و بارهێنان و هەم لە بواری یاریی جۆرابێن بەرز بنرخێندرێ. بۆ ئەو مەبەستە لەسەر شانی بەرپرسانی ئەو دوو بەشەدا ئەرکە کە ناو و یادی کاک کەماڵ بەرز ڕاگرن و فەرامۆشی نەکەن.
|
