| تاريخ: ۱۴۰۳ پنج شنبه ۹ فروردين ساعت ۱۴:۳۹ | بازدید: 836 نظرات: 0 کد مطلب: 22833 |
عەباس غەزالی: نووسین و چاپکردنی "فەرهەنگیی زارەکیی موکریان" شانازییەکی بێ پایانه
مه‌نسوور جیهانی ـ "عه‌باس غه‌زالی" که‌سایه‌تی چالاکی فه‌رهه‌نگی هه‌رێمی کوردستان، به بۆنه‌ی جەژنی لێبوونەوە و چاپکردنی "فەرهەنگیی زارەکیی موکریان" له نووسینی "سەلاح پایانیانی" له خانەی فەرهەنگیی موکریان لە شاری هەولێر، جه‌ختی کرده‌وه: نووسین و چاپی "فەرهەنگیی زارەکیی موکریان" شانازییەکی بێ پایانه، چونکه بناغەیەکی پتەوی فەرهەنگیی و شێوازێکی زانستیانەی فەرهەنگ نووسی هاتە ناو کتێبخانەی کوردییه‌وه.
"عه‌باس غه‌زالی" که‌سایه‌تی چالاکی فه‌رهه‌نگی و ئه‌ندامی به‌رچاو و ڕاوێژکاری فه‌رهه‌نگی و هونه‌ری پارتی دیموکڕاتی کوردستانی عێراق و نوێنه‌ری پێشووی په‌ڕله‌مانی هه‌رێمی کوردستان؛ له په‌یامێکدا به بۆنه‌ی نووسیوییه‌تی: "بە بۆنەی جەژنی لێبوونەوە لە "فەرهەنگیی زارەکیی موکریان" بە سەری بەرزەوە پیرۆزبایی لە هەموو گەلی کوردستان، بە تایبەتی دڵسۆزانی بواری کەلتوور، دەکەم کە بناغەیەکی پتەوی فەرهەنگیی و شێوازێکی زانستیانەی فەرهەنگ نووسی هاتە ناو کتێبخانەی کوردییه‌وه. هەروەها پیرۆزبایی لە شاری مەهاباد دەکەم کە بووە پێشەنگی ئەو شێوازە فەرهەنگ نووسییە.
فەرهەنگیی زارەکیی موکریان جگە لەوەی لە کاتێکی هەستیاردا زمانی پاراست و فەرهەنگیی شەفاهی ناوچەیەکی دەوڵەمەندی کوردی هێنایە ناو کتێب بە شێوازە زانستییەکەی وای کرد کە لە داهاتوودا ناوچەکانی دیکەی کوردستانیش بەو ڕێچکەیەدا بڕۆن و فەرهەنگی ڕەسەنی نەتەوەی کورد دەوڵەمەند بکەن.
ئەم کارە پڕ مشەقەت و کاتگرە، کە لە ڕاستیدا کاری دەزگایەکی دەوڵەتییە، کاری سی ساڵ تێکۆشانی بێ وچانی لاوی لێهاتوو، سەنگین، بەڕەوشت، خاکی و لەخۆبردووی کورد، مامۆستای ڕوح سووک و بیرگران کاکە سەلاحی پایانیانییە کە نموونەی کاری وەک ئەو لە ئاستی جیهاندا دەگمەنن.
وەک کەسێکی خەڵکی دەڤەری بارزان بە پێویستی دەزانم سوپاسی تایبەتی کاک سەلاح بکەم کە شانازیی چاپ کردنی ئەو کارە گرانسەنگەی داوەتە خانەی فەرهەنگیی موکریان لە شاری هەولێر و هەروەها سوپاسی خانەی فەرهەنگیی موکریان دەکەم کە بەپیری پێشنیاری کاک سەلاحەوە هاتن و ئەو ئەرکە فەرهەنگی و مێژووییەیان بە باشترین شێوە له‌ئەستۆ گرتووە."
عەباس غەزالی میرخان
هەولێر
٨ی خاکەلێوەی 2724ی کوردی
٢٧/٣/٢٠٢٤ زایینی
|
