| تاريخ: ۱۳۹۵ شنبه ۱۱ دي ساعت ۲۰:۱۳ | بازدید: 3131 نظرات: 5 کد مطلب: 2637 |
هۆکاری به‌ڕێوه نه‌چوون و هه‌ڵوه‌شانه‌وه‌ی کۆنسێرتی ماملێ له مه‌هاباد
به پێی ڕاپۆرتی هه‌واڵده‌ری هاژه، کۆنسێرتی هونه‌رمه‌ند عه‌بدوڵڵا ماملێ له شاری مه‌هاباد بۆ جاری دووه‌م هه‌ڵوه‌شایه‌وه.
عه‌بدوڵڵا ماملێ بڕیار بوو شه‌وی 2ی به‌فرانبار له تالاری وه‌حده‌تی شاری مه‌هاباد به هاوکاری گرووپی که‌ویاری سنه کۆنسێرتێک به‌ڕێوه به‌رێت.
ئه‌م هونه‌رمه‌نده له وت‌ووێژ له‌گه‌ڵ هاژه ڕایگه‌یاندبوو: له دوای شۆڕشی گەلانی ئێران بۆ یه‌که‌م جارە کە لە مەهاباد کۆنسێرت دادەنێم و ئەوەش ده‌گه‌ڕیته‌وه بۆ ئه‌وه که دوای بڵاوبوونه‌وه‌ی گۆرانی "نازەنین" پێشوازییه‌کی بێ‌وێنەی لێکرا و لە سەر داواکاری و هاندانی دۆستان تەمام بە دانانی کۆنسێرتێک گرت.
دوو ڕۆژ به‌ر له به‌ڕێوه چوونی کۆنسێرت هونه‌رمه‌ند ماملێ به هاژه‌ی ڕاگه‌یاند: به هۆی ڕووداوی هات‌وچۆ له ڕێگای بۆکان ـ سه‌قز و بریندار بوونی ده‌نگ هه‌ڵگر و شکانی هێندێک له ئامێره‌کانی مۆسیقا کۆنسێرت له ڕێکه‌وتی ئاماژه پێکراوه‌ردا به‌ڕێوه ناچێت.
ئه‌گه‌رچی هه‌ڵوه‌شانه‌وه‌ی کۆنسێرت له لایه‌ن خودی ئه‌م هونه‌رمه‌نده بوو به هۆی سه‌رسووڕمان له لایه‌ن ئیداره‌ی فه‌رهه‌نگ و ئیرشاد و لایه‌نه په‌یوه‌ندیداره‌کان، به‌ڵام هه‌وڵه‌کان بۆ سه‌رله‌نوێ به‌ڕێوه چوونی کۆنسێرته‌که به‌رده‌وام بوو و له ئاکامدا زاره‌کی ڕۆژی 9ی به‌فرانبار وه‌ک ڕۆژی به‌ڕێوه چوونی کۆنسێرت دیاری کرا هه‌ر چه‌ند نامه‌یه‌کی نووسراو و مۆڵه‌تی به‌ڕێوه چوون به شێوه‌ی نووسراو بۆ ئه‌م ڕۆژه ده‌رنه‌کرابوو.
به‌دواداچوونه‌کانی هه‌واڵنێری هاژه سه‌باره‌ت به به‌ڕێوه‌نه‌چوون و هه‌ڵوه‌شانه‌وه‌ی کۆنسێرتی هونه‌رمه‌ند عه‌بدوڵڵا ماملێ و وته‌کانی لایه‌نه‌کانی په‌یوه‌ندیدار به‌و قه‌ناعه‌ته‌مان ده‌گه‌یه‌نن که "له‌بار نه‌بوونی بارودۆخ" بۆ به‌ڕێوه چوونی کۆنسێرت ده‌کرێ وه‌ک هۆکاری سه‌ره‌کی هۆڵوه‌شانه‌وه‌ی کۆنسێرت پێناسه بکرێ و هه‌روه‌ها بیروبۆچوونه‌کانی به‌رپرسانی په‌یوه‌ندیدار ئاماژه به‌وه ده‌که‌ن که ئه‌م هۆنه‌رمه‌نده بۆی هه‌یه له کات و ساتێکی دیکه‌دا و سه‌ر له‌نوێ داوای مۆڵه‌تی به‌ڕێوه چوونی کۆنسێرت بکا.
هه‌ڵوه‌شانه‌وه‌ی کۆنسێرت له شاره‌کانی ئێران له‌وانه‌یه یه‌که‌م جار نه‌بێت ئه‌گه‌رچی له‌وانه‌یه دوایین جاریش نه‌بێت، به‌ڵام ئه‌وه‌ی جێگای نێگه‌رانی هونه‌رمه‌ندانه ئه‌وه‌یه که هه‌ڵوه‌شانه‌وه‌ی کۆنسێرتی ماملێ له مه‌هاباد به چه‌شنێک ڕێگه خۆشکه‌ر بێت.
