۱۴۰۳/۹/۲ ۱۶:۱۶
| تاريخ: ۱۳۹۸ پنج شنبه ۲۵ مهر ساعت ۱۰:۳۲ | بازدید: 1982 نظرات: 0 کد مطلب: 12818 |
کوردێک بووه باڵیۆزی ئه‌مه‌ریكا
بە پێی ڕاپۆڕتی پێگەی هەواڵی هاژە، ڕۆژی 16ی ئـۆکتۆبەری2019 ھێرۆ موستەفا بە ئـامادەبوونی جان سولیوان یاریدەدەری وەزیری دەرەوە سوێندی یاسایی خوارد و لە بولغارستان وەک باڵوێزی ئـەمه‌ریکا دەست بەکار بوو.
بۆ یەکەم جار لە مێژووی ویلایەتە یەکگرتووەکانی ئەمەریکا، کوردێک بە ناوی هێرۆ قادر محەمەد ئەمین موستەفا وەک باڵیۆزی ئەمەریکا لە کۆماری بولگاریا لە لایەن دۆناڵد ترەمپی سەرۆکی ئەمەریکاوە دەستنیشان کرا.
ئەو ئافره‌ته خەڵکی شاری هەولێرە و چەندین بەرپرسیارەتی لە حکوومەتی ئەمەریکا هەبووە. لە ساڵی 2016، لە باڵیۆزخانەی ئەمەریکا لە وڵاتی پورتوگال کاری کردووە و راوێژکاری سیاسی بووە لە باڵیۆزخانەی ئه‌مه‌ریكا له نیوده‌لهی لە هیندستان.
لە ساڵانی 2009 بۆ 2011، راوێژکاری جۆ بایدن بووه بۆ کاروباری رۆژهەڵاتی ناوەڕاست و باشووری ئاسیا.
هێرۆ یەکێک بووە لەوانەی، لە نزیکەوە چاودێری دانووستانەکانی گروپی ٥ كۆ ١ی لەگەڵ ئێران کردووە. لە ئەنجوومەنی ئاسایشی نیشتمانیی ئەمەریکا، بەڕێوەبەری کارەکانی ئێران، ئیسرائیل – فەڵەستین و ئوردن بووە. لە ساڵی 2005 بە ئەرکێکی سیاسی لە شاری مووسڵ کاری کردووە و چەند بەرپرسیارەتی سیاسی لە لوبنان و یۆنان و ئەفغانستانیش هەبووە.
ئەو سیاسییە کوردە، لە ویلایەتی نۆرس داکۆتا ژیانی بەسەر بردووە و جیا لە ئینگلیزی، زمانەکانی کوردی، عەرەبی، فارسی، یۆنانی، هیندی و پورتوگالی دەزانێت و لە زانکۆی پرینستۆن ماستەری لە خزمەتگوازاری سیاسەتی دەرەوە بەدەستهێناوە.
هێرۆ موستەفا لە دایکبووی ساڵی 1973 لە شاری هەولێرە و کچی تێکۆشەری دێرین عەبدولقادر محەمەد ئەمین، دامەزرێنەر و سەرنووسەری رۆژنامەی بارزانە کە لە ئەمەریکا دەردەچوو.
|
برچسب ها:
ئـەمه‌ریکا , باڵیۆزخانەی , بولغارستان , گزارش, هاژه, ویلایەتە یەکگرتووەکانی ئەمەریکا, کوردانه
