گەڕانی پاسی تەندروستی لەنێو گەڕەکەکانی شاری سنە

ماوەیەکە لە شاری سنە ڕێکخراوەی مەدەنی «تێکۆشەرانی تەندروستی» (تلاشگران سلامت) بە هاوکاری لەگەڵ نۆ ڕێکخراوەی دیکە لەنێو پاسێکدا چالاکییەکی خۆبەخشانەیان دەستپێکردووە. ئەم کەسانە ڕۆژانە لەنێو گەڕەکەکانی شاری سنە دەگەڕێن و بەشێوەی خۆبەخش پشکنینی نەخۆشییەکانی HPV، HIV و هێپاتیت بۆ خەڵک دەکەن.

شادی مەولانی بەڕیوەبەری ڕێکخراوەی «تێکۆشەرانی تەندروستی» لە وتووێژ لەگەڵ هاژه ڕایگەیاند: «ئێمە سەرەتا ساڵی ۲۰۱۸ ئەم چالاکییەمان دەستپێکرد و ۱۵۰ کیتی پشکنینی HIVمان لە خەڵک وەرگرت و بینیمان کە پێشوازی خەڵک باشە. هەر ئەو سالیش کاری فێرکاری و ڕاوێژکاری لەسەر ئەم نەخۆشییانە بۆ خەڵک کرا کە ئەنجامێکی ئەرێنیی هەبوو. ئێمە لەگەڵ کارناسانی زانکۆی زانستە پزیشکییەکانی سنە لەسەر نەخۆشییەکانیHIV و HPV و هێپاتیت خولی فێرکاری و ڕاوێژکاری خۆبەخشانەمان بۆ خەڵک و بەتایبەت ئەو کەسانەی سێکسی پێش هاوسەرگیرییان هەبووە، دانا.»

پێشنیاری ئەم پلانە سەرەتا ساڵی پار لە لایەن پارێزگاری کوردستان و زانکۆی زانستە پزیشکییەکانی سنە درا و شارەوانی سنەش پاسێکی تایبەت بە کەم ئەندامانی بۆ ئەم پرۆژەیە دابین کرد.

شادی مەولانی کە ماوەی ۱۵ ساڵە خەریکی چالاکی کۆمەڵایەتییە و بەرپرسی «ماڵی لاوان» لە سنەیە، دەڵێت: «چالاکی ئەمجارەمان لە سەرەتای پاییزەوە دەستی پێکردووە و تا هەرکات خەڵک پێشوازی لێ بکات، درێژەی هەیە. ئێمە سەرەتا ماوەی هەشت ڕۆژ لە پارکی ئیستقلالی شاری سنە بووین و سێ ڕۆژی دوایی ڕۆیشتین بۆ گەڕەکی نایسەر کە پتر لە ۱۰۰ هەزار دانیشتووی هەیە و بەداخەوە خەسار و مەترسی لە بواری سێکسی لەوێ زۆرترە. پاشان دوو ڕۆژ لە شارۆچکەی بەهاران بووین و یەک ڕۆژیش لە مەیدانی غاز هەبووین.»

مەولانی لە درێژەی قسەکانیدا ئاماژە بە پلانە پەراوێزەکانی پاسی تەندروستی دەکات و دەڵێت: «لە تەنیشتی ئەم پشکنین و فێرکاری و ڕاوێژکارییە پزیشکییانە، ئێمە بە بۆنەی حەفتەی کتێب خوێنی لەگەڵ خۆمان کتێب دەبەین و دەیدەین بە دەستی خەڵکەوە، هەروەها مۆسیقا و پێشانگای وێنەمان هەیە و بەرنامەهایەکی دیکەمان لەنێو پاسەکەدا هەیە کە زیاتر دڵخوازی لاوانە.

ئەندامانی سەرەکی ئەم چالاکییە کە زۆربەی ئەم چالاکییە لە ئەستۆیان بووە، خانمان شادی مەولانی و نەسرین ئیبراهیمی و بەڕێز ڕشاد مورادی بوون و ئەو ئەنجومەنانەی کە لەسەر ئەم پلانە لەگەڵ ڕێکخراوەی مەدەنی «تێکۆشەرانی تەندروستی» هاوکارییان هەبووه، بریتین لە: ئەنجومەنی شێرپەنجە، ئەنجومەنی نەخۆشییەکان، ئەنجومەنی هێمۆفیلی، ئەنجومەنی دژ بە کێشانی جگەرە، ئەنجومەنی MS، ئەنجومەنی نەخۆشییەکانی گورچیلە، ئەنجومەنی ژیانەوە، ئەنجومەنی ساڕێژ و ئەنجومەنی ژیوەر.

جێگای ئاماژەیە کە بنکەیەک لە گەڕەکی شەریف ئاوای شاری سنە هەیە کە لەم بوارەوە کاری ڕاوێژکاری خۆڕایی دەکات و تێستی خۆڕایی لە خەڵک دەگرێت. ئەگەر کەسێک جوابی پشکنینەکەی پۆزەتیڤ بێت، دێتە ژێر چاودێری ئەم بنکەیە و پاڵپشتی لێ دەکرێت و پرۆسەی دەرمانی دەست پێدەکات.