سەدوبیست ساڵ لەمەوبەر لەڕۆژێکی وەک ئەمڕۆدا یەکەم رۆژنامەی کوردی بەناوی "کوردستان" لەسەردەستی ماڵباتی نیشتمانپەروەری بەدرخانەوە، لە قاهیرە بڵاوکرایەوە. ئەویادە پیرۆزە قەت لەبیرناکەین بەڵام دەشزانین رۆژنامەگەریی کوردیی بەهاسانی نەگەیشتۆتە ئەم ئاستە و تا بە ئەمڕۆ چ ڕێگەیەکی پڕهەورازونشێوی تێپەڕاندووە. ئەگەر باسی مێژووی رۆژنامەوانیی کوردیی لە ئێراندا بکەین، هەمومان ئاگامان لێیە کە لە سەردەمی رژێمی پەهلەویدا کتێب و نوسینی کوردیی قەدەغە کرابوون و لە چەن قۆناغی کورتی مێژووییدا نەبێ کە رۆژنامەگەریی کوردیی گڕوگاڵێکی کرد، دەنا هیچ دەگۆڕێدا نەبوو تا وەک پڕۆسەیەکی بێپسانەوەی رۆژنامەگەری کوردیی ناوی ببەین . ئەوەش دەزانین کە لەو سەدوبیست ساڵەدا گەلێک کەسایەتی و خەمخۆری گەل و نیشتمان هەبون کە کۆڵیان نەداوە و قۆڵێان لێهەڵکردووە  و هەرکەسە و بەگوێرەی توانا و دۆخی سەردەمی خۆی تینێکی وەبەرداوە و رۆژنامەگەریی کوردیی لە پەیژەی دیرۆکیی خۆی بەرەو ژوور پاڵ پێوەناوە. ئێستاش دەمەوێ یادێک بکەم لە گۆڤارێکی کوردیی ڕچەشکێن کە بواری بۆ درێژەدان بە رۆژنامەگەریی کوردیی خۆشتر کرد، بۆیە جێی خۆیەتی و بەشیاوی دەزانم ئاماژەیەک بکەم بە گۆڤاری"گرشەی کوردستان" وەک یەکەم ئەزمونیی فەرمیی رۆژنامەگەریی کوردیی لەدوای سەرکەوتنی شۆڕشی گەلانی ئێران لەساڵی ۱۹۷۹دا کە لەسەردەست و بە پێشەنگایەتی نوسەروتوێژەری تێکۆشەر دوکتور محەممەدساڵح ئیبراهیمی ناسراو بە مامۆستا شەپۆل لەدایک بوو و وەک ئەستێرەیەک لە ئاسمانی رۆژنامەگەریی کوردیدا درەوشایەوە و بێگومان، گرشەوورشەی ئەو گۆڤارە بووە رێشاندەری کەسانی دی، تا کاروانی رۆژنامەگەریی کوردی بەرەوپێش ببەن.

بەو هیوایە کە چرای رۆژنامەگەریی کوردی هەردەم روناکتر بێ.