بە پێی هەواڵی پێگەی هەواڵیی هاژە ژمارەی 204ی گۆڤاری مەهاباد چاپ و بڵاوکرایەوە. لە سەروتاری ئەم ژمارەیەدا مودیر مەسئوولی گۆڤاری مەهاباد وێڕای پیرۆزبایی هاتنی ساڵی نوێ، ئاماژە بەمە دەکا کە چەرخی ژیان هەر لە سووڕان دایە و ساڵەکان دێن و ڕادەبڕن و دەنووسێت: "بەرەی مڕۆڤ بۆ زاڵ بوون بە سەر کەندوکۆسپەکانی‌دا چارەی هەر ئەوەیە کە دەست لە هومێد بەرنەدا."
ئەحمەد بەحری لە سەر ئەم شەڕ و خوێن ڕشتنەی کە وا بەرۆکی ڕۆژهەڵاتی ناوڕاستی گرتووە و بە تایبەتی گەلی کوردی کردۆتە ئامانج، گلێیی و گازندە لە زل هێزەکان دەکا و دەڵێت: "لە پێش چاوی دنیا، کوردانی ئیزەدی قەڵاچۆ کران، کچان و ژنان بە یەخسیر بران و لە بازاڕەکان وەک بەردەی جینسی فرۆشران! جگە لە هات و هاوارێکی ڕەسانەیی، دونیا هیچی دی نەکرد."
بەحری لە سەر گرێدانی ئەو شەڕە لە سەر خاکی کورد، لەسەر بڕوایه‌یە کە: "تاوانمان هۆگری بە کەرامەتی ئینسانە، تاوانمان ئاشق بوون بە هەموو ئەو کردەوانەن کە هەوێنی ئینسانییەتن."
مودیر مەسئوولی گۆڤار، شکانی داعش لە ڕۆژهەڵاتی ناوەڕاست کە جیهان لێی تۆقیبوو و تەنیا کورد توانی لیمبۆزی ئەو لە عەرز بدات و هاوکات پشت بەستن بە زل‌هێزەکان و وڵاتانی ڕۆژئاوایی دەخاتە ژێر پرسیار و دەنووسێت: "پێمان وا بوو قەرەبووی ئەو هەموو قارەمانەتی و لە خۆ بردوویی‌یەمان بۆ دەکەنەوە، بۆ دابین بوونی مافی سەرەتاییەکانمان پشتیوانمان دەبن، بەڵام ڕووداوەکان نیشانیان‌دا باوەڕ بە ڕۆژئاوا بێ خێرە و تا ئێرە ئاش بەتاڵی بۆ هێناوین".
بەحری لەسەر ئەو بڕوایەیە کە زل‌هێزەکان تەنیا لە بەرژەوەندی خۆیان دەگەڕێن و بەداخەوە "نەوت، ئەو کانگا گرینگە، بووەتە بەڵای گیانی خەڵکی ڕۆژهەڵاتی ناوین".
ئەو لە کۆتایی‌دا ڕێکخراوی نەتەوەیەکگرتووەکان بە بێ‌دەسەڵات و دەستەوەستان ناودەبات و دەڵێت: "لە بەر چاوی دنیا چوارچێوەی سنوورەکان بە بیانووی دیفاع لە ئازادی دەبەزێنن و گەلان دەچەوسێننەوە" و لە جیاتی ئەوەی کە پارێزەری دێموکراسی بن لە خزمەت قسەی دیکتاتۆر و ملهۆڕان دان.
وتاره‌کانی ئەم ژمارەیە لە دوو بەشی کوردی و فارسی و لە سەر بەشی کۆمەڵایەتی، فەرهەنگی و ئەدەبی پێکهاتوون کە وتارەکانی بەشی کوردی 18 دانە و وتارەکانی بەشی فارسی 8 دانە لەخۆ دەگرن کە لە بەشی کوردی‌دا بێجگە لەم وتارانە فایلی "کەونەنیشتمان"، "دوو وێنە" و هەر وەها "شێعر" تێخزێندراون.
وتارە کوردییەکان بریتین لە:
مەرگی دێموکراسی لە ڕۆژهەڵاتی ناوین‌دا / مودیر مەسئوول
بەرەو زمانی یەک‌گرتوو / عەبدوڵڵا عەبدوڵڵازادە
میتانی، لکێک لە مادەکان / مراد نەزەری
"دۆڵی شەهیدان"ی پشدەر / ئاوات سەید ئەحمەد
لە پێناو زمانی کوردی‌دا / ئەحمەد بەحری
سێبەری زیندووی نووسین / عەلی غوڵام‌عەلی
کلیسەی ئاغەزەمان / سەلام ئیسماعیل‌سورخ
وەرزشوانێکی سەرکەوتوو / سوارە فتوحی
سەفەرێک بۆ باخچەی ئاوات / سەلیم ئارووم
مۆسیقی کوردی لە لێواری هەڵدێری نەمان‌دا / ناسر کە‌ریمی
زمانی زگماکی یا زمانی دایکی؟! / ڕامان غەفووری
دایکی هێمن و بیرەوەرییەک / نەسرین جەعفەری
سنوورداریی وشەسازییەکانی شێعر لای یونس ڕەزایی / ئیسماعیل بابایی
شاری پینەوپەڕۆ / قادر عەلیخا
مەرگاوی ژین / سروە مەجیدی
هزر و داهێنانی ئەدەبی / هادی حەبیبی
دەردەزێم / ورگێڕان: ئەمین گەردیگلانی
زوڵماوا / وەرگێڕان: فایەق دارتاش
وتارە فارسییەکان بریتین لە:
زبان مادری یا زبان رسمی
مهاباد شهر اول خلاق ایران در توسعە و ترویج کتاب و کتابخوانی
منشات میرزا یوسف ساوجبلاغی / عزیز یوسفی
کوردها در روابط بین‌الملل / شریف عظیمی
مروری بر نوشته‌ها و زندگی عبدالقادر طبیب / محسن مولوی
نابغە‌ای گمنام / سوارە فتوحی
اطلاع‌رسانی اتاق اصناف مهاباد / قادر حبیبی
چهارشنبە آخر سال و تعطیلات نوروز / معاونت اجتماعی فرماندهی انتظامی مهاباد
وێنەی ڕووبەرگی ئەم ژمارەیە لە یەکێک لە تابڵۆ کێشراوەکانی ماشاڵڵا محەممەدی پێکهاتووە.