به‌ ڕاپۆرتی ئاژانسی هاژە بە گێڕانەوە لە مێهر، کورتە فیلمی "بینای ژمارە ۱۳" لە دەرهێنانی ئەمیر غوڵامی دەرهێنەری گەنجێکی بۆکانی، خەڵاتی تایبەتی لیژنەی داوەرانی چوارەمین خولی فێستیڤاڵی کاپ سپارتێلی وڵاتی مەغریبی مسۆگەر کرد.

به‌ پێی ئه‌م ڕاپۆرته‌، پەرویز جاهد سەرۆکی لیژنەی داوەرانی چوارەمین خولی فێستیڤاڵی کاپ سپارتێل (Cap Spartel Film Festival)ی وڵاتی مەغریب سەبارەت بە هەڵبژاردنی ئەو کورتە فیلمە وەک تاقە هەڵبژاردەی ئێران لەو فێستیڤاڵە وتی: لیژنەی داوەران بە کۆی دەنگ بە هۆی نیگا و فانتازیای شاعێرانە، داهێنانی وێنەیی و فەزای سوورڕیالسیتیی "بینای ژمارە ۱۳"، خەڵاتی تایبەتیی لیژنەی داوەروانیان بەو کورتە فیلمە بەخشی.

شایانی باسه‌ که‌ کورته‌ فیلمی، "بینای ژمارە ۱۳" وەک بەرهەمی هاوبەشی ئەمیر غوڵامی و حەوزەی هونەریی پارێزگای کوردستان پێشتریش خەڵاتی باشترین دەرهێنەری لە فێستیڤاڵی نێونەتەوەیی فیلمی سەربەخۆی لەندەن، خەڵاتی باشترین دەنگ‌هەڵگری لە مێهرەجانی فیلمی ناوچەیی شاری سمنانیشی مسۆگەر کردووە.

هه‌روه‌ها بڕیار وایه‌ که‌ ئه‌م کورته‌ فیلمه‌ لە مانگەکانی داهاتوودا، وێرای بەربژێربوونی بۆ بەشی کێبەرکێکان، لە ۵ فێستیڤاڵی نێونەتەوەیی نمایش بکرێت.