ئەوا جارێکی دیکەش ڕۆژی موعەللیم بە برووقە و زرووقەی خۆی، لە ئاسۆی وڵات هەڵات و قەد و لاپاڵی بیرگەکانی وەژێر تیشک و شەبەقی خۆی خست و خانوولەی ساردی دڵانێکیشی گەرم داهێنا....
ئەو ساڵیش وەکوو ساڵەکانی پێشوو، قەڵەمە تیژەکان، پەڕینە سەر گەڵاکان و زمانە پاراوەکان کێشرانە پشت میکڕۆفۆنەکان، هەتا لە ڕۆژێک‌دا و، بەڵکوو لە چەند ساتی ڕۆژێک‌دا، دنیایەک ئاسەواری تەعلیم و فێرکاری و شوێنەواری فێرکار و موعەللیم، لە ڕووناک‌کردنی حەوای ژیان و، لە هەڵسووڕاندنی چەرخ و چەنبەری کار و باری وڵاتەکەمان بە خەڵکی ڕاگەیەنن...
......بەڵام! من لام وایە کاتی ناساندنی شوێنەواری تەعلیم و موعەللیم، تەنیا ڕۆژێک و حەوتوویەک و مانگێک نییە، بەڵکوو تەواوی کات و ساتەکانی ڕۆژ و حەوتە و مانگ و ساڵەکانە و، بۆ ناساندنی ڕێزی تەعلیم و فێرکاری و قەدر و قودبی موعەللیمیش لە هەموو کاتەکانی ساڵ‌دا هەزاران پێنووس لە کار دان و هەزاران زار و زمان دەنگ دەدەنەوە و بە درێژیی ڕۆژگار، چ لە سەر سینگی سپیی ڕۆژ و چ لە نێو دڵی ڕەشی شەو، هەر پێنووسیک بە سەر لێنووسێک‌دا ڕاست ڕادەخوشێ و سیڕەی دێ و، هەر چەرخ و چەنبەرێکی بەدەوری سەری خۆی‌دا دەسووڕێ و هاڕە و خشەی دێ و، هەر لەت و کوت و قرتم و پێچ و مۆرەی کارخانەیەکی کە هەر یەک لە جێگای خۆی، خرتە و قرتە و کرتە و گرمە و زرمەی دێ ، تێکڕا زار و زمانی هاوارکردن بۆ ڕاگەیاندنی ڕێزی موعەللیمن؛ چونکە تەواوی ئەو کارە ڕەنگینانە و ئەو ئاسەوارە نەخشینانە، بەرهەمی تەعلیم و شوێنەواری کار و تێکۆشانی موعەللیمن......
کۆمەڵی بەعەلاوەی موعەللیم بەرابەرە بە کۆمەڵێکی خوێندەواری تێگەیشتوو و پێگەیشتوو و«بەکاروپیشەوسەنعەت‌وتێکنیک-گەیشتوو» و یەکگرتوو و، کۆمەڵی مینهای موعەللیم بەرابەرە به کۆمەڵێکی پڕژ و بڵاوی لاپرەسەنی زەنگۆڵی زەبەللاحی‌هەناسەساردی«بەهیچ‌کوێ‌نەگەیشتوو»و له هیچ-تێنەگەیشتوو.
....هەر وەکوو باغ و زەمەندێکی ئاوی لێهەڵببڕدرێ و چەند ساڵان ئاو نەدرێ، گیا و گوڵەکان دەبنە پووش و بارە و، دارەکان دەبنە ویشکەڵ و، سەفا و بەر و بوویەک نامێنێ، هەروا کۆمەڵی گەورەی بەشەری بێتوو ماوەیەک تەعلیمیان لێهەڵببڕدرێ و موعەللیمیان لە نێودا نەبێ، دەچنەوە غارەکان و دەکشێنەوە بۆ ڕۆژگاری دنیابەردینە.
له یەک پیت و ڕستەدا، کۆمەڵی بێ موعەللیم یانی کۆمەڵی غارنشین و دنیابەردینە و، کۆمەڵی پەرەگرتووی تەعلیم و بەردەستی موعەللیم، یانی کۆمەڵی ئینسانانی مانگ‌نشین و کۆمەڵی ئینسانانی ڕۆژگاری کارەبا و ئەتۆم و ئەلەکتڕۆنیک و کامپیووتێر و ئینتێرنێت و بەولاوەتریش......
موعەللیم تەنیا تەونگەرێکە کە خاوک و کولو و هۆربە وەردگرێ و تەندراوێکی نەخشین و ڕەنگین وەدەست دەداتەوە....
موعەللیم ئەندازیارێکە لە کارخانەی زاناسازی‌دا، نەزان وەردەگرێ و زانا دەردەتەواوە...
موعەللیم تەنیا ئەستێرەناسێکە کە لە دوای شەوی ڕەشی نەزانی، هەڵاتنی ڕۆژی ڕووناکی زانستی ڕادەگەیەنێ.....
موعەللیم تەنیا پەنایەکی خۆشەویستییە کە کوڕ و کچە ژیکەڵەکان باوەشی گەرمی دایک و بابەکانیان بەجێ دێڵن و هەڕا دەکەنە لای ئەوان و گەنج و لاوە دڵ پڕ لە ئاواتەکان هەموو سەرقاڵییەک وەلادەنێن و دێنە کۆڕی گەرمی ئەوان......
هەمیشە هەر هەڵێ ڕۆژی موعەللیم و،
بڵاوتر بێ تیشک و نووری ڕۆژی موعەللیم....
☑️ سەرچاوە :
"خەزێنە"-کۆمەڵە وتاری ئەدەبی، توێژینەویی و مێژوویی- ؛
بەشێک لە وتاری: "هەر هەڵێ ڕۆژی موعەللیم".