بەپێ هەواڵی هاژە، ڕۆژی هەینی، ۲۸ی بانەمەڕی ۱۴۰۳، کۆڕیادێک بۆ هونەرمەندی بواری فۆلکلۆر، «حەمەجان» لە ئاوایی سەدرابادی بۆکان بەڕێوەچوو.
ئەم ڕێوڕەسمە لەسەر بانگهێشتی ئیدارەی میراتی کلتووری شارستانی بۆکان و لە باخی ئیلخانی‌زادە ساز درابوو.
لەم رێ‌وڕەسمەدا هەندێک کەسایەتی هونەری و ئەدەبی کە بریتی بوون لە: قادر ئازمەند، ستار حوسێن‌زاده و مه‌نسوور بارام‌به‌گی به شێوەیەکی زانستی لەسەر گرینگایه‌تی بەرهەمەکانی حەمەجان و هەروەها پێویستی پاڵپشتی‌کردن لە بواری فۆلکلۆری کوردی دوان.
هەروەها تاقمێک لە هونەرمەندان لە چەند پاژی جۆراوجۆردا، بەرهەمی هونەرییان پێشکەشی ئامادەبووانی ڕێ‌وڕەسمەکە کرد. لەوانە: یەسنا عاڕفی، باران کیانی، ئەمیر بوخارایی، برایانی عەلیپوور، عەلی فرووتەن، سوڵتان مستەفاپوور و ڕەحیم مام‌محەممەدی.
شۆڕش محەممەدپوور، بەرپرسی ئیدارەی میراتی کلتووری و خاتوو خزری، بەخشداری بەشی ناوەندیی بۆکان لە وتاربێژانی ئەم ڕێوڕەسمە بوون.
لەم ڕێ‌وڕەسمەدا پەیامی بنەماڵی جان لەلایەن «داود جان» ئاراستە کرا و هەر یەک لەشاعیران: ئەمین گردیگلانی و ڕەحیم مینایی بەرهەمێکی شێعرییان پێشکەش کرد.
«حەمە جان» خاوەن دەنگێکی شاز بووە و زۆربەی بەیتەکان و حەیرانەکانی فۆلکلۆری کوردی گوتووەتەوە کە هەندێکیان تۆمار کراون.
شایانی باسە کە دەنگی «حەمەجان» لە پێرستی میراتی نابەردەستی وڵاتی ئێراندا تۆمار کراوە.
«حەمەجان» ساڵی ۱۲۹۶ لە گوندی سەیداوای بۆکان لەدایک بووە و ساڵی ۱۳۶۵ لە نەخۆشخانەی «سینا»ی تەورێز بەهۆی نەخۆشیی گەدە کۆچی دوایی کردووە.
بەپێی پێناسەی فەرمیی بەردەست کە زۆریش ڕاست نییە، حەمەجان ساڵی ۱۳۵۹ کۆچی دوایی کردووە.