بە پێی هەواڵی هاژە، قەڵای کەرکووک لە لایەن ڕێکخراوەی یونسکۆوە خراوەتە لیستی کاتیی شوێنەوارە جیهانییەکانەوە.
ئەحمەد کازم، بەڕێوەبەی بەشی ڕێکخراوە نێودەوڵەتییەکان لە دەستەی گشتیی شوێنەوار و کەلەپووری عێراق ڕایگەیاند، قەڵای کەرکووک لە لایەن ڕێکخراوەی یونسکۆوە لە نێو لیستی کاتیی شوێنەوارە جیهانییەکانەوە خزێندراوە.
ئەحمەد کازم گوتی: ڕێکخراوەی یونسکۆ لەم دواییانەدا قەڵای کەرکووکی خستە لیستی کاتیی شوێنەوارەکانی جیهان، ئەمەش بەهۆی مانەوەی ئەم شارە وەک سەمبولی پێکەوە ژیان دێت. بەو پێیەی مزگەوتی دانیالی پێغەمبەر، مزگەوتی گەورە، مزگەوتی عوریان و کلیسای کلدانی ئوم ئەحزانی تێدایە، ئەم شارە لە ئاستی جیهان‌دا بایەخی خۆی پێوە دیارە.
ئەحمەد کازم ڕوونی کردەوە، بڕیارەکە بە گوێرەی پێوەرەکانی ڕۆشنبیری و شارستانییەتی دەگمەنی ئەم شوێنە دراوە، چونکە قەڵای کەرکووک لە ڕووی جۆری بنیاتنان و ئەندازەییەوە دەرخەری قۆناغێکی گرنیگە کە لە مێژووی مرۆڤایەتییدا بایەخی پێدەدرێت.