مردنێكی كاریگه‌ری دوو هاوژین له ویلایه‌تی میشیگانی ئه‌مه‌ریكا بووه به باسی ژماره‌یه‌ك له میدیاكانی جیهان، ئه‌و ژن و مێرده‌ی ماوه‌ی 70 ساڵ پێكه‌وه ژیان، به‌ڵام دواساته‌كانی ژیانیان ته‌نها 20 خوله‌ك یه‌كێكیان بێ ئه‌وی دیكه‌یان ژیاوه و هه‌ردووكیان له ته‌مه‌نی سه‌رووی 90 ساڵه‌وه كۆچی دواییان كرد.
به‌گوێره‌ی راپۆرتێكی رۆژنامه‌ی ده‌یلی مه‌یلی به‌ریتانی (لی) و (فریدا ئه‌وستن) ته‌مه‌نیان گه‌یشتبووه سه‌رووی 90 ساڵ، دواساته‌كانی ژیانیشیان له ته‌نیشت یه‌كه‌وه بوون.
لی و فرێدا مێژووی هاوسه‌رگیرییه‌كه‌یان ده‌گه‌ڕێته‌وه بۆ ساڵی 1949، ماوه‌یه‌ك پێش ئێستاش هه‌ر دووكیان گواسترابوونه‌وه خانه‌ی به‌ساڵاچوان، سه‌ره‌تا پیاوه‌كه مردووه و دوای 20 خوله‌كیش هاوژینه‌كه‌ی له ته‌نیشتییه‌وه كۆچی دوایی كرد.
به‌گوێره‌ی راپۆرته‌كه‌ی ده‌یلی مه‌یلی به‌ریتانی، ئه‌و ژن و مێرده مانگی رابردوو به‌هۆی 70 ساڵه‌ی هاوسه‌رگیرییان ئاهه‌نگیان گێڕابوو، كوڕ و كچێك و 4 نه‌وه‌یان هه‌یه. ئه‌و دوو هاوسه‌ره یه‌كه‌مجار له قۆناغی خوێندنی ناوه‌ندی یه‌كترییان بینیوه، پێده‌چێت هه‌ر ئه‌و كاته بڕیاریان دابێت هه‌موو ته‌مه‌نیان پێكه‌وه بژین و له یه‌كتری دانه‌بڕێن.
لی و فریدا زۆر حه‌زیان له گه‌شت و گه‌ڕان و مانه‌وه بووه له ناوچه جۆراوجۆره‌كان و خێوه‌تیان هه‌ڵده‌دا. یه‌كترییان زۆر خۆشویستووه و ئه‌وه‌ش بۆ به‌ره‌نگاربوونه‌وه‌ی سه‌ختییه‌كانی ژیان هاوكارییان بووه.